Pan Balang Tamak

Ada reko anak madan Pan Balang Tamak, maumah di desa anu. Kacrita ia sugih pesan tur ririh makruna, muah tuara nyak kalah teken pada timpalne di deśa totonan. Baan te saking kruna daya upayane anggona ngamusuhin deśane. Yen upamaang dayan Pan Balang Tamake, patuh buka bun slingkad lutunge, baan saking beneh. Ento kranane Pan Balang Tamak sengitanga baan desane. Yen tuah dadi baan desane, apanga ia makisid wiadin mati apanga sing ada enu nongos di desane totonan. Baan te tra ada mintulin pagaen desane, bakal ngaenang dosan Pan Balang Tamake ento.

Di sedek dina anu paum desane bakal nayanang Pan Balang Tamak, mangdene ia kena danda. Lantas panyarikan desane nunden ngarahin Pan Balang Tamak, kene arah-arahne, ”Ih Pan Balang Tamak, mani semengan mara tuun siap, desane luas ka gunung ngalih kayu, bakal anggon menahin bale agung. Nyen ja kasepan, bakal danda.” Keto arah-arahe teken Pan Balang Tamak.

Kacarita manine semangan mara tuun siyap, lus desane makejang, nanging Pan Balang Tamak masih enu jumah padidian, krana ia ngantiang siapne tuun uli bengbengane. Makelo ia ngantiang, tonden masih siapne tuun. Ada jenengne makakali tepet, mara siapne tuun uli di bengbengane, ditu mara ia majalan, nututin desane luas ngalih kayu ka gunung. Tonden makelo ia majalan, tepukina krama desane suba pada mulih negen kayu, dadi Pan Balang Tamak milu malipetan. Kacrita suba neked jumah, lantas desane paum, maumang Pan Balang Tamak lakar kena danda, krana ia tuara nuutang arah-arahe. Ditu laut desane nunden ngarahin Pan Balang Tamak.

Kacrita Pan Balang Tamak suba teka, lantas klihan desane makruna, ”Ih Pan Balang Tamak, jani cai kena danda. Masaut panyarikan desane, ”Ento baan caine tuara ngidepang arah-arahe ngalih kayu ka gunung.” ”Mangkin, mangkin jero panyarikan, sampunang jerone ngandikayang titiang tuara ngidepang arah-arahe, dening kenten arah-arahe ane teka teken titiang: desane mani semengan mara tuun siap bakal luas ka gunung. Dening tiang ngelah ayam asiki buin sedek makaem, dadi makelo antiang tiang tuunne uli di bengbengane. Wenten manawi sampun kali tepet, mara ipun tuun. Irika raris titiang mamargi, nuutang sakadi arah-arahe ane teka teken tiang. engken awanan tiange kena danda?” Keto munyin Pan Balang Tamake, dadi desane sing ada ngelah keneh nglawan paksanne Pan Balang Tamak.

Kacrita buin maninne Pan Balang Tamak karaahin ngaba sengauk, bekel menahang bale agung. Pan Balang Tamak ngaba sanggah uug ka pura desa sambilanga makruna kene, ”Ene sanggah uug, apanga benahanga baan desane.” Dadi engon desane ngenot abet Pan Balang Tamake keto. Baan keto masih tan sah keneh desane bakal ngaenang salah Pan Balang Tamake.

Maninne Pan Balang Tamak kaarahin maboros ka gunung. Kene arah-arahe, ”Mani desane maboros, apanga ngaba cicing galak. Nyen ja tuara ngelah cicing galak, lakar kena danda.” Keto arah-arahe arah-arahe ane teka teken Pan Balang Tamak. Krama desane suba pada yatna, nene tuara ngelah cicing galak, pada nyilih. Yen Pan Balang Tamak ngelah kuluk bengil aukud buin tuara pati bisa malaib.

Kocap buin maninne las desane maboros, tur pada ngaba cicing galak-galak, ngliwat pangkung ngrembengan dalem-dalem. Yen Pan Balang Tamak majalan paling durina pesan sambilanga nyangkol cicingne. Mara ia neked sig ngrembenge, sing dadi baana ngliwat, lantas ia ngae daya apang mangden desane teka nyagjagin ibanne, laut ia jerit-jerit. ”Bangkung tra gigina, bangkung tra gigina.” Mara dingeha baan desane, kadena timpalne nepukin bangkung, lantas pada nyagjagin. Mara neked ditu enota Pan Balang Tamak jerit-jerit, lantas takonina: ”Apa kendehang Pan Balang Tamak?” Masaut Pan Balang Tamak, kene pasautne, ”Pangkung tra ada titina.” Beh, sengap deśane, belog-beloga baan Pan Balang Tamak. Payu baangina titi, gantin Pan Balang Tamake tuara kena danda. Kacrita suba neked di alase, lantas deśane pada ngandupang cicingne ka tengah bete, ada ne ngepung kidang, ada ngepung celeng, ada ngepung manjangan, ada ngongkong bojog sig punyan kayune. Yen Pan Balang Tamak kelad-kelid sambilanga nyangkol cicingne mara neked punyan ketkete. Lantas entunganga cicingne ka punyan ketkete. Ditu koang-koang cicingne ngengsut, tuara bisa tuun, tra bisa menek, laut Pan Balang Tamak masaut: ”Ih jero deśa, tingalin cicing tiange ngraras ka punyan ketkete. Nyen deśane ngelah cicing galak buka cicing tiange? Jani tiang nandain deśane, baan deśane sing ada ngelah cicing galak buka cicing tiange.” Keto munyin Pan Balang Tamake, dadi deśane sing ada bisa masaut, payu kenaina danda baan Pan Balang Tamak. Suba kone keto lantas pada mulih maboros.

Kacrita maninne buin karahin Pan Balang Tamak, yen deśane mani sangkep di bale banjare. Mara Pan Balang Tamak ningeh arah-arahe keto, lantas ia ngae jaja uli injin, bakal anggona melog-melog deśane. Maninne makiken sangkep, lantas Pan Balang Tamak ngaba jaja uli injin, mapulung-pulung amun tain cicinge teken yeh, laut pejang-pejangina sig sendin bale banjare muah kecirina teken yeh. Nyen ngaden tra tain cicing?

Kacrita suba pepek deśane, lantas Pan Balang Tamak mauar-uar, kene munyine, ”Ih jero makejang, nyen ja bani naar tain cicinge totonan, tiang ngupahin pipis siu.” Masaut panyarikanne, ”Bes sigug abete mapeta, ento nyen nyak ngamah tain cicing? Indayang cai ngamah. Lamun bani, icang ngupahin pipis siu.” Mara keto lantas pelen-pelena baan Pan Balang Tamak, dadi cengang deśane ngiwasin Pan Balang Tamak bani ngamah tain cicing. Puputne payu deśane dendaina sin baan Pan Balang Tamak. Dening keto mawuwuh-wuwuh brangtin deśane muah tan sah bakal ngaenang daya upaya, manang dane Pan Balang Tamak mati wiadin kena danda.

Maninne buin Pan Balang Tamak kaarahin, yen sing eda dadi ngenjek karang anak muah malih-alihan ka abian anake, yen lejeh bani, bakal kena danda gede. Keto uar-uare. Jet keto baan Pan Balang Tamak tuara keweh, krana ia saking patut. Ditu ia ngae daya, gerete pulete ane di sisin pekene anggona abian pagehina lidi, apesina baan benang.

Kacrita mara tebeng pekene, ada anak makita masakit basang, lantas nylibsib ka pulete, laut masuak Pan Balang Tamak, ”Ih jero deśa, tiang nandain anak ngamaling ka abian tiange.” Dadi cengang anake ne masakit basang endahanga baan Pan Balang Tamak. Masaut anake masakit basang, ”Apa salah tiange, muah dadi nagih nandain jerone?” Masaut Pan Balang Tamak, ”Jerone macelep ka abian tiange muah mamaling pamula-mulaan tiange. Ento apa bongkos jerone?” Mara ungkabanga, saja mrareket pulete sig kambenne. Puputne payu ia dendaina baan Pan Balang Tamak.

Kacrita deśane keweh pesan ngencanin Pan Balang Tamak, daya kudang daya singa ada mintulin. Ne jani keneh deśane bakal nunasang paporongan teken anake agung.

Gelisang crita, cuba kone kicen cetik ane paling mandina, apanga Pan Balang Tamak mati sapisanan. Kocap Pan Balang Tamak suba ningeh bakal kagae-gaenang patinne, lantas ia makruna teken kurenanne, ”Yen awake suba mati, gantungin bok awake temblilingan. Suba keto sededengang sig piasane. Buina pagelah-gelahane pesuang, pejang sig bale sekenem, rurubin baan kamben putih sambilang pangelingin. Nah, bangken awake wadahin peti, pejang jumah meten.”

Gelisang crita, suba Pan Balang Tamak mati ngamah cetik paican anake agung. Lantas Men Balang Tamak nuutang buka pabesen Pan Balang Tamake. Kacrita deśane ngintip Pan Balang Tamak, mati kalawan tan matine. Mara ia neked jumah Pan Balang Tamake, Pan Balang Tamak masededeg sig piasanne sambilanga mamantra ngambahang bok. Ditu deśane maselselan, pada ngorahang cetike jelek. Lantas deśane buin parek ka puri, ngaturang panguninga yen Pan Balang Tamak tuara mati. Mara keto bendu anake agung, dening cetike kaaturang tra mandi. Lantas ida ngandika, ”Kenken cetike dadi tra ngamatiang, indayang awake ngasanin. Mara ajengan ida abedik, lantas ida seda prajani.

Kocap Men Balang Tamak ningeh orta, yen anake agung suba seda ngajengan cetik, lantas ia ngekanang bangken kurenanne buka ne suba.

Kacrita suba sanja, ada dusta ajaka patpat mapaiguman, bakal mamaling ka umah Pan Balang Tamake. Mara enota kurenan Pan Balang Tamake mangelingin kurenanne sig bale sekeneme, lantas ia macelep ka umah meten, tepukina peti gede buin baat pesan, laut sanglonga, senamina, tegena ajaka patpat. Suba kone neked ka tengah bete, makruna timpalne, ”Dini suba gagah!” Masaut timpalne, ”Maebo bangke dini, jalan indayang dituan.” Lantas kisidang masih maebo bangke. Buin makruna timpalne, ”Jalan suba aba ka pura deśa, ditu nyen bani ngutang bangkaan.” Masaut timpalne, ”Jalan!” Lantas tegena petine, abana ka pura. Mara neked ditu, lantas ungkabanga. Mara enota bangken Pan Balang Tamake nyengkang, lantas plaibina, kutanga petine ditu.

Kacrita maninne mara galang kangin, nuju jero mangku ngaturang canang ka pura, mara nengok sig kori agunge, tingalina ada peti gede di natah piase, lantas jero mangku masila tiding sambilanga nyumbah: ”Bataran titiange mapaica, bataran titiange mapaica.” Baan sing ada bani mungkah, ngantiang apanga pepek deśane teka. Mara teka ukud nyumbah, teka ukud nyumbah.

Suba kone pepek pada nyumbah, lantas petine bungkaha, nget bangken Pan Balang Tamake nyengku, dadi tengkejut deśane, buin pada misuhin bangken Pan Balang Tamake. Ento japin pisuhin, mlutang ya, kadung suba bakat sumbah. Puputne deśane tuyuh meanin muah nanemang bangken Pan Balang Tamake. Keto katuturannya.

Posted in: Satua Bali